Ќе се отворат нови 4 рудници за бакар и злато

Во источна и југоисточна Македонија на повидок е отварање четири рудници за бакар и злато. Деканот на Природно-техничкиот факултет на универзитетот „Гоце Делчев“-Штип Зоран Панов вели дека според неговите проценки, најпрво може да се отвори „Казан дол“ во валандовскиот регион.

– Учествувам во изработка на студијата и на главниот проект и сметам дека најбрзо рудникот може да се отвори идната пролет. Експлоатацијата сигурно ќе задоцни една година, но подготвителните работи, како што се изградба на пристапни патишта и објекти ќе почнат следната година. Тоа е оптимистичката варијанта која мислам дека ќе се случи, изјави Панов.

Инвеститорите, додаде, сериозно работат и на отварање на рудниците Кадиица во Пехчево, Иловица во Василево и Златица – Плавица на територија на Пробиштип и Кратово. Поради нивната сериозност и подршката на Владата, се зголемува и бројот на студенти на природно-техничките факултети.

– Источна и југоистона Македонија ги очекува големи проекти.  Како декан на Факултетот за природно-технички науки се плашам дека не можеме да одговориме на барањата за вработување нови инженери. Рудникот Иловица можеби ќе има потреба од 50 инженери или 100-тина, имајќи предвид дека ќе биде најголемиот рудник на Балканот, нагласи Панов.

Според него, рударството и геологијата нудат перспектива за студентите, но и за оние кои сакаат да се запишат на природно-техничките факултети.

Моментно, радовишки „Бучим“ е единствениот рудник за бакар и злато во земјава, а неговиот опстанок по 2020 година ќе зависи од отворањето на рудникот „Боров дол“ кој е на територија на Штип и Конче.

Exit mobile version