Кичевчанец со страст кон филателијата и колекционерството (фото)
До пред некој ден немав слушнато за него. Откога слушнав ми беше непријатно како сум можел да го пропуштам. Што е тука е.
Синиша Павлески е кичевчанец. Негова страст се поштенските марки. Ги има од цел свет. Страста за собирање кај него се јавила кога ја видел поштенската марка со ликот на птицата љубов. Поседува колекција од преку 10 000 поштенски марки со ликови на птици. Најчесто ги набавува по интернет од целиот свет. На овој начин се спријателил со триесетина луѓе со кои ја делат истата пасија, а се допишува со десет пати повеќе. Неговата најголема поткрепа во неговото необично хоби е ќерката Јана. И како што „бива“ за наш човек, помалку е познат дома отколку надвор.
– Сум учествувал на дваесетина меѓународни филателистички изложби (со 3 теми Папагали, Петел и Хокеј на мраз), за жал, повеќе се пишува околу тоа, надвор во странство, од колку во Македонија. Имам освоено 17 филателистички медали (со дипломи) и тоа е со сигурност најмногу во Македонија.
За колекцијата марки „Папагали“ го добил златниот медал на меѓународната изложба „Алпе Адрија“ во Крањ.
Синиша живее во Скопје, но за себе вели „јас сум и останав Кичевчанец во душата“. Навива за Напредок и е страствен навивач на Македонската репрезентација на која нема пропуштено ниеден домашен натпревар. Нормално, ги чува картите од сите натпревари. Сите ги купил, освен еден, на натпреварот со Унгарија кој го добил како гратис.
Павлески во моментов работи на каталог на поштенски марки од Република Македонија кои биле во употреба во годините по независноста, а работи и на книга „Поштенската историја на градот Кичево“.