Отворените терени во Кичево летово останаа во темнина
За разлика од претходните две лета, кога во овој период од годината блескаа рефлекторите на спортските терени во кругот на поранешниот интернат, а потоа и на кошаркарското игралиште на Правниот факултет во Кичево, годинава за жал овие игралишта останаа во темнина.
Прекрасна беше глетката кога со десетици па и стотици млади на овие терени се рекреираа во вечерните саати, кога температурите за спортување се многу поблагопријатни. Дури беа организирани и турнири во мал фудбал и кошарка, на кои одзивот беше исклучително висок. За жал, барем до сега, спортските терени немаат осветлување, а младите се ускратени за убавата можност да спортуваат под ведро небо. И не само што не светнаа рефлекторите, туку на теренот во интернатот ги нема ни обрачите на кошевите, тревата околу терените не е воопшто покосена, а хигиената е под секое рамниште.
-Иако посакувавме во вечерните часови да играме кошарка , сепак на отворените терени рефлекторите не работат. Во дилема сме дали летово ќе имаме можност барем една недела да одиграме ноќен баскет-велат младите кошаркари од КК Кичево.
Зоран Антоски